MENDIA: ARTZENAKO MENDIZERRA

Colaboradores – Laguntzaileak: Donostia Kirolak – Gipuzkoako Foru Aldundia

GOMENDIOAK:

Ohizkoak: mendiko botak, goretex edo txubaskero, txanoa eta eskularruak, hamaiketakoa, bazkaria eta ura. Aldatzeko arropa eraman, baita oinetakoak ere.

DESKRIBAPENA:

Burgos eta Arabaren artean dagoen Artzena mendilerroa zeharkatuko dugu, Valderejo Parke Naturala (Araba) eta Montes Obarenes–San Zadornil Parke Naturala (Burgos) lotzen dituen ibilbide ikusgarrian. Autobusez Arabako Barrio herrira joango gara, eta handik hasiko dugu txangoa. Herritik irten bezain laster pista bat hartuko dugu, eta pagadi eder baten barrena eguneko lehen aldapa igoko dugu Hoz lepora (989 m). Ondoren, pinudi eta pagadien artean Bachicabo tontorrera (1.182 m) iritsiko gara. Handik, inguru harritsua zeharkatuz, Mota (1.277 m) eta, altuera ia galdu gabe, Cueto tontorra (1.344 m) igoko ditugu; azken hau mendilerroko punturik garaiena da. Tontorretik Valdegobiako eta Tobalinako haranen bista zoragarriak izango ditugu. Jarraian, Portillo de Nograro igaro eta Risco del Mojón Acuchillado (1.342 m) tontorrera iritsiko gara. Berriro Portillora itzuliko gara jaitsierari ekiteko, Campa de las Majadas (1.159 m) eta Barranco Canalejo zeharkatuz. Azkenik, nekazaritza-lurren artean ibilita, San Martín de Don (Burgos) herrira iritsiko gara. Ibilbide osoan baso ikusgarriak, kareharrizko paisaia malkartsuak eta Arabako zein Burgosko bista paregabeak izango ditugu.